عزيزى الهاوى النباتي …..
زى ما قريت كده من العنوان ان المقال هيشرحلك انت محتاج تعمل ايه عشان تحول حوضك
من مستوى ال low Tech لhigh tech
يعنى من منخفض التقنية الى عالي التقنية..
مبدأيا كده اعمل حسابك ان الموضوع ده محتاج تكاليف و متبخلش باى معلومة تبحث عنها اوى تكاليف مادية .
ليه ممكن حد يفكر يعمل الخطوة دى ؟
عشان توسع قاعدة تربية النباتات و تربي كل الالوان و الاشكال و الاحجام و حرية الحركة فى الانماط .
تعالي اقولك بقى انت محتاج تغير ايه عشان الخطوة دى ……
ثانى اكسيد الكربون CO2
انت لازم توفر منظومة ثانى اكسيد الكربون و ده مربط فرس الموضوع لاهميته و هو يمثل 50% من تكاليف الخطوة دى .
و فى النقطة الجاية هتعرف ان الاضاءه هتزيد جدا لارتباطهم ببعض .
لكن ارجع واقولك حاذر من انك تسترخص فى المنظومه دى نهائيا او تستخدم موضوع نظام السيتريك اسيد الزجاجتين .
توفير الغاز مهم جداااا لعمليه البناء الضوئى و سد احتياج النباتات من الطاقة و الانتاج غير ان له تأثير قوى على صحة النباتات …
راعى حجم ضخ الغاز يكون مناسب لكثافة النباتات و حجم الحوض عن طريق الببل كاونتر .
الاضاءة :
بدل ما كان اضاءة الحوض لا تتعدى ال 20 ليومان/لتر
هنا هيتم تطوير الاضاءه تدريجيا للوصول
لاكثر من 40 ليومان/لتر و الموضوع ده هيتم تدريجيا
يعنى مش فجأة هتغير الاضاءة لأكثر من 40 ليومان يعنى هتعدى على مرحلة الميديوم عشان حوضك لا يصاب بالطحالب و اولها الطحالب البنى …
بواقع 6 او 8 ساعات يوميا فى توقيتات ثابته بأستخدام تايمر ال24ساعة
هتقولى اركب اضاءة ايه ؟
اقولك اى حاجة تعجبك سواء ليد بار او كشافات مخصصة او تصنيع مصرى او لمبات قلاوظ ( دة انا برشحة بقوة)
بس المهم توفر 75% طيف ابيض و ال 25% باقى الاطياف بين الازرق و الاصفر و الاحمر موزعين على مساحة الحوض بأرتفاع 15سم من سطح المياه
التغذية :
هنا انا قاصد اقول التغذية مش التسميد …
لان لو عندك امكانية هد الحوض و تضيف طبقة1سم اسفل الحوض فيرمى كومبوست (مصدر موثوق فيه) من وجهة نظرى هتبقى خطوه داعمة لسد احتياجات النباتات من التغذية ( ملحوظة : الفيرمى مينفعش يتنقع و لا يتغسل)
او ممكن تستعين ب روت تابس محترم مستورد او اكتف سويل محترم زى ADA او سيكم مش صينى .
التسميد السائل :
طبعا هنا هيتم مضاعفة الجرعات و لو انت من مستخدمين اسمدةshahen farm nitrate fertilizer
هتلاحظ ان فى جدول تسميد مخصص للفئة الهاى تك نظرا لاحتياج النباتات فى المستوى ده تغذية كتير بكافة العناصر الكبرى و الصغرى .
التربة و الصخور و الاخشاب :
التربة/ الركيزة : افضل نوع هى رمل الفلاتر حجم2ملل.
الصخور و الاخشاب : عينك عليها اول بأول من ظهور الطحالب عليها و يفضل كسوتها بالموس فى اماكن مكسورة الاضاءة .
النباتات :
هنا هيتم الاحلال و التبديل للنباتات تدريجيا تزامن مع الارتفاع التدريجى للاضاءة ..
يعنى : هتبدأ تقلل مثلا من نبات السيسفلورا بدل ما كانوا 10
هتخليهم 5 و ال 5 نباتات الجديدة يكونوا نباتات ميديوم تك زى المرميد ويد و الالنتيرا و الروتالا فيتنام و روتالا روتندفوليا.
لابد من الاستغناء الكامل لاى نبات اوراقة طويله زى الفلسناريا مثلا حتى لا تصاب اورقها بالطحالب و لا يكسر اتجاه الاضاءه و يحرم النباتات من قوة الاضاءة .
اى نبات بطئ النمو زى الجافا فيرن و الانوبيس هيتم نقلهم اسفل ركن نباتات اللوتيك مكسورة الاضاءة .
منطقة وسط و مقدمة الحوض هى النصيب الاكبر للنباتات الهاى تك نظرا لتمركز الاضاءة .
نباتات الهاى تك تحتاج لرعاية خاصة من درجة حرارة و تغذية و تقليل النترات و ال tds فى مستوى ال300 ppm و الph متوازن7 .. للحفاظ على الوانها و جمال اورقاها من التشوهات .
طبعا النباتات الطويل و السريعة فى الخلف و القصيرة فى الامام نهاية بنباتات الكاربت زى المونت كارلو و الجلوستيجما و المارسيليا و الUG.
الموس بجميع انواع يفضل على الصخور فى اماكن مكسورة الاضاءه لتجنب اصابتها بالطحالب .
الفلترة و تغيير المية :
الفترة هنا لازم تكون محترمه جدا حسب امكانيتها بلاش الفلاتر الهانج 
..
حسب امكانياتك المادية من البورهيد لحد الفلتر الكانستر حسب حجم الحوض .. المهم يكون فى تيار مياه داخل الحوض جيد جدا جدا جدا جدا للتغلب على مسببات الطالب .
احذر ثم احذر مسببات الطحالب .. و عدم التسرع فى اجراءات الحوض و انشاءه … الاهتمام بالصيانة الدورية .
يارب اكون قدرت اوفى بكل الجوانب و نقلت المعلومة العملية و العلمية صح .. لو حد عندة اى استفسار فى التعليقات .
