فى علم أسمة إدارة الازمات دايما بيعتمد على التحليل العلمي للمشاكل و الاستناد على البحث العلمي للوصول لطريقة التعامل مع الازمة بناء علي التجارب و الخبرات العديدة .
فى عالم الاكواريوم و خصوصا فى عالم النباتات كتير بتواجهنا مشاكل و نقف منعرفش نبدأ منين بالظبط أو نعمل أيه و هل الى بنعمل ده صح ولا غلط .. كلامنا النهاردة مهم جدااااااا و تجارب تعرضنا ليها .
فى دايما غلطات بنعملها كفيلة انها تحرق الاوراق مبدأيا و لو فضل أثر الغلط ده موجود ممكن يوصل للساق و الجدور و تدمر النبتة … زى مثلا حطيت جرعة اى مادة كيميائية بشكل مضاعف ( أسمدة _ مية اكسجين _ جلتورالدهيد { كربون سائل } _ مثيلين بلو _اى مادة تحتوى على فورمالين …. الخ ) او غيرت مية وعملت صدمة للنبات او غيرت مية و فى كلور عالى في المية سواء فى الصيف او الشتاء ا
كل دى تاثرات تُظهر أوراق النبات محروقة أو عليها طبقة لامعة زيتية أو الورق أصبح شفاف .. ساعتها تقف لا عارف تبدأ منين و لا تعمل ايه
هقولك سناريو تعملة بالظبط او ما تبقى فى موقف من الى ذكرتهم :
اول حاجة تستهدى بالله كده و متتوترش خالص و تركز للكلام الى جاى .
ثانيا دائما وابدا خليك محتفظ على جنب بمية قد نص حجم حوضك لان انت هتغير نص مية الحوض للتخفيف من أثر اى مادة كميائية سببت الكارثة و تهتم بتنضيف الفلتر اول بأول و زياده الفترة و الاكسجين فى المية ولو حصل صدمة للنبات طبعا مش هتغير مية
ثالثا لو قدرت تقص اكبر قدر من النباتات(خصوصا فى حالة المثيلين بلو ) لو عندك حوض تزرع فيه المقصوص أو جردل ميه معالج او من حوض سليم تحط فيه النبات و تشغل عليه الاضاءة بشكل منتظم لحد ما الحوض يستقر … و كمان لو فى قطع خشب او صخور عليها موس ارفعها فى جردل ميه .
خليك محتفظ دايما بمجموعة من الزيولايت (ربع كيلو تمنة لا يتعدى 10ج) لموقف زى ده .. هتحطة فى شبكة أو شراب فلية .. و تحطة فى الحوض مع او جمب الفلتر لان الزيولايت شديد الامتصاص لاى امونيا لاى مواد كيميائية لاى أملاح طبعا هتستخدمة فى الفترة الحرجة دى بس و يترمى .
بعد 24 ساعة هتغير نص المية تانى فى وجود الزيولايت لسه .. كده يبقى احنا غيرنا 100 % من المية بأمان دون الخلل من أستقرار الحوض نسبيا و عدم تعريض الاحياء للموت بصدمة .
من المتوقع خلال 4 ايام النبات اورقة تسقط جزئاً / كلياً كل ما عليك سحب الاوراق و التخلص منها أول بأول .. لتفادى مشكلة الطحالب البنى و ارتفاع الامونيا.
هتقلل 25% من اضاءة الحوض و كمان 25 % من ثانى اكسيد الكربون co2 لتخفيف الاجهاد على النبات .. ( زى بالظبط اى كائن حى تعبان او عندة إجهاد لازم هتريحة اسبوع و بعدين يرجع لنشاطة الطبيعى تانى ) و ده الى هنعملة فعلا مع النبات خصوصا ان الاوراق ال بتمتص الضوء تحللت .
هتهتم جدا بتسميد العناصر الصغرى جداااا و الاحماض الامينية( موجود فى جروت باكت ×10) لمساعدتة على الاستشفاء و إنتاج أوراق جديدة
ايقاف إستخدام الحديد fe نهائيا و تخفيض جرعة الاسمدة الكبرى ل 50% لمده اسبوع .
إياك ثم إياك ثم إياك ثم إياك إستخدام اى مادة كميائية لعلاج الطحالب مثلا زى الجلوتالدهيد (كربون سائل) او مياة الاكسجين … لانك هتزود الاجهاد .
منتظر ارأكم و تجاربكم …..
#shahen_farm_aquscape #معمل_النباتات #كن_ملك #No_Algae_No_Snail
