المقال ده فى بدايتة لو قريتة ممكن يوصلك ان الموضوع لا علاقة لة بأهداف ومواضيع الصفحة و لكن لو كملت لحد الاخر هتعرف انا قصدى ايه و هتفهم بعض الامور و الرسالة الى حابب اوصلها .
فى مادة كيميائية / هرمون بيفرزها الجسم اسمها الدوبامين Dopamine و هو ناقل عصبى مؤثر فى الانسان يطلق عليه (هرمون السعادة ) المادة دى الانسان ربنا خلقة بيها عشان يقدر يشعر و يتحكم فى سعادتة .. و بعض الاحيان فى تدريبات بتتعمل لمساعدة الجسم على افراز المادة كعامل تحفيزى / او مكافأة على أنجاز تم و الخروج من حالة الحزن و الشقاء.
فى مادة كيميائية بيفرزها الجسم اسمها ادرينالين Adrenaline هو برضوا هرمون و ناقل عصبى مهم جدا بيسمى بهرمون ( الخوف او التوتر ) كنوع من انواع وسائل دفاع الجسم عن نفسة من الانهيار و مواصلة التركيز .
هرمون السعادة ليه تدريبات كتير جدا عشان نزودها فى جسمنا للتغلب على حالة الحزن او المشاعر السلبية و اثبتت الدراسات العلمية بعض الطرق ال ممكن الانسان يعملها لزيادة الهرمون ده و يخرج من اى حالة سلبية
زى لعب الرياضة أو أكل الشوكلاتة أو اكل وجبات فيها كربوهيدرات كتير اوى أو تربية كائن حى او تأمل الطبيعة او اكل مكسرات .
الى يخصنا من كل ده( التأمل و تربية كائن حى ) الطريقتين احنا بنقوم بيهم فى هوايتنا بغرض الاستمتاع و السعادة (بخلق ربنا و ابداعة) و ميمنعش تتأمل وانت بتأكل شوكلاتة كده الدماغ عالية اوى 
ممكن تتعب اوى لتهيئة حوضك او تتكبد مبالغ او تنتظر رسالة سمك بغرض الوصول للحظة السعادة الى بيشعر بيها جسمك و عقلك فى تأمل العمل دة و الاستمتاع بيه و تغيير مودك و حالتك النفسية مع حوضك … و لما تنجح مع حوضك سواء فى تفريخ السمكة او الاكثار من النبات ده اسمة حافز النجاح ال دورة بينتج الدوبامين … ده غير الالوان المبهجة فى الاسماك و الرقع الخضراء من النباتات .
لاقدر الله بقى فى ظروف بايخة دايما بنتعرض ليها من انتكاسات او موت سمك اومرض نبات او مرض سمكة بطبيعة الحال الجسم هيفرز الادرينالين عشان يقدر يخليك تواجه المشكلة و تفكر فى حل و توصل للنجاح من تانى .
الخلاصة حوضك هو ملاذك و منفذك من الشقاء سبيل للعودة من ضغوط الحياة .. الجزء البسيط من الطبيعة ال اخدت قرار تقتنية فى بيتك …
الهواية هى الدوبامين هو السعادة المنشودة يعنى ممكن أقول على محل /مزارع السمك و النباتات هم تجار سعادة .. مصدر سعادة .. بائع فرحة ..انت الدكتور النفسى .. انت مصدر للدوبامين فى السوق .. السعادة دى خير و ربنا هيجازيك خير عليها لازم يكون جواك كيميا و تركيبة تأهلك فى إسعاد الهواة .
الهاوى هو باحث السعادة باحث عن الدوبامين و الحافز لافرازة .
فى النهاية اجعلوا الهوايه دوبامين و ليس ادرينالين استمتعوا بما خلقة الله
